Equality and Human Rights Commission

Rhaid i’ch cyflogwr wneud yn siŵr nad ydyn nhw’n gwahaniaethu yn eich erbyn neu’n peri anfantais sylweddol i chi os ydych chi’n berson anabl. Ystyrir unrhyw beth sy’n fwy na mater bach neu bitw yn anfantais sylweddol.

Gall hyn olygu bod gofyn iddyn nhw wneud addasiadau rhesymol i weithdrefnau dewis gweithwyr i’w hyfforddi, neu’r trefniadau hyfforddi eu hunain. Gall hyn gynnwys y ffordd maen nhw’n gwneud pethau, neu newidiadau i’r adeiladau a ddefnyddir, neu ddarparu cymhorthion, gwasanaethau neu offer ychwanegol.

Gallwch ddarllen mwy am addasiadau rhesymol i symud rhwystrau i bobl anabl fan yma.

Mae hyn yn cynnwys eich cyflogwr yn edrych ar y ffordd mae’n sicrhau eich bod yn cael cyfleoedd megis secondiad, cysgodi gwaith, mentora neu fynychu digwyddiad all eich helpu i ddatblygu’ch gyrfa.

Hyfforddiant arbenigol

Gall fod angen i’ch cyflogwr ddarparu hyfforddiant arbenigol ar eich cyfer er mwyn ichi wneud defnydd effeithiol o addasiadau rhesymol. Gallai hyn gynnwys hyfforddiant ar offer sydd gennych fel addasiad, er enghraifft, meddalwedd cyfrifiadurol arbenigol.

Neu gall yr hyfforddiant ynddo’i hun fod yn addasiad, er enghraifft, hyfforddiant cyfeiriadedd mewn gweithle newydd os oes gan rywun anabledd dysgu neu nam ar y golwg.

Hyfforddi staff eraill

Gall hefyd fod o gymorth i’ch cyflogwr ystyried anghenion hyfforddi staff eraill sy’n gweithio gyda chi fel addasiad rhesymol (cyn belled â’ch bod wedi rhoi caniatâd i’r staff wybod am eich amgylchiadau). Gallai hyn amrywio o hyfforddiant arbenigol i reolwyr sy’n gwneud penderfyniadau ynghylch addasiadau rhesymol, i rywbeth fel hyfforddiant ymwybyddiaeth o fod yn fyddar i bobl sydd â chydweithiwr Byddar.
 

Os ydych chi’n debygol o fod yn gymwys i gael eich dyrchafu neu’ch trosglwyddo neu i gael cyfle datblygu arall, a’ch bod yn berson anabl:

• Ni ddylai’ch cyflogwr wneud unrhyw ragdybiaethau am eich gallu neu’ch parodrwydd i  ymgymryd â rôl newydd.
• Mae’n bwysig hefyd i’ch cyflogwr ystyried a oes angen cymwysterau arbennig neu ai’r  hyn sydd ei angen mewn gwirionedd yw lefel sgiliau arbennig.
• Ni ddylai unrhyw wybodaeth am y rôl nodi neu awgrymu ei bod hi’n anaddas i berson  anabl oni bai bod yna reswm clir sy’n gysylltiedig â’r rôl am hynny.
• Dylai’ch cyflogwr ddweud wrth bawb, gan gynnwys gweithwyr sydd ag anabledd, am  unrhyw gyfle i gael dyrchafiad, neu gyfle arall i drosglwyddo neu ddatblygu. Mae  hynny’n cynnwys rhoi’r wybodaeth i chi yn y fformat a ddefnyddiwch fel arfer yn y  gwaith, er enghraifft, print bras neu’n electronig. Mae hyn yn debygol o fod yn  addasiad rhesymol.
• Os bydd eich cyflogwr yn eich gwahodd i gyfweliad am ddyrchafiad neu gyfle arall a’u  bod yn gwybod eich bod yn berson anabl, rhaid iddyn nhw wneud unrhyw addasiadau  rhesymol sydd eu hangen arnoch i fynychu a chymryd rhan yn y cyfweliad.
• Wrth asesu’ch addasrwydd i’r rôl newydd, dylai’ch cyflogwr ystyried sut gallai  addasiadau rhesymol eich galluogi i gwrdd â’r gofynion newydd.
• Os bydd eich cyflogwr, ar ôl ystyried sut gallai addasiadau rhesymol eich galluogi i  gwrdd â gofynion newydd rôl maent yn ystyried eich dyrchafu iddi, yn penderfynu nad  y chi yw’r person gorau ar gyfer y dyrchafiad, does dim rhaid iddyn nhw ei gynnig i chi.  Wrth reswm, os mai chi yw’r person gorau byddant am ei gynnig i chi a gwneud yr  addasiadau rhesymol.